Trauergemeinde üwwer de Jüdische Friedhof in Frankfurt am Main gang, weil mer die Cilly Peiser beerdicht honn.
Sechs Tag zevor hommer noch in Langen zesamme mit ihre Famillje unn Freunde ihr 85. Geburtstag gefeiert – äns von de schönschte Feschte, das ich je mitgefeiert honn.
Uffem Weg zum Grab simmer anneme Grabstein vorbeikomm, uff dem stand: „Menschen, die wir lieben, sterben nie.“ Do muscht ich an e Stein uffem Sowwerummer Friedhof denke, der mich schon seit meine Schulzeit fasziniert, uff dem is ingemeißelt: „Die Liebe höret nimmer auf“. Später honn ich dann erfahre, dass der Satz aus em erschte Korintherbrief vom Paulus stammt – was e großer Text, so klar unn änfach!
„Menschen, die wir lieben, sterben nie“ – do denkt de Kopp erscht emol: Das kann doch gar nit stimme. Die Cilly Peiser is gestorb unn mer sinn debei, se zu Grab ze trage.
Awwer es Herz wäß, dass der Satz stimmt: Fer mich unn fer alle, die mitgehn uff dere Beerdichung. Die Cilly Peiser werd nit vegess werre, solang e Mensch lebt, der se gekennt hott. Denn wer se gekennt hott, hott se geliebt! Unn warum? Weil se geleucht hott wie e Kerz im Dunkele unn weil se echt war.
Wer ihr begejent is, konnt immer ebbes mitnemme von ihrm Wese, ihrm Humor. Unn irjendwie konnt mer gar nit annerscht, als es selwer weiterzugewwe.
Zu de Cilly Peiser fällt mer e englischer Spruch in, der die Sach uff de Punkt bringt: „You got to practice, what you preach“ – „Lebe, was du lehrst“. De Cilly ihr Lehren hott aus ihrem Lebe bestann: Se hott kä Redde geschwung üwwer Großherzichkeit, Menschlichkeit unn Mut, sondern se is großherzich, menschlich unn mutich gewese.
Vor fünf Woche war se noch in Sowwerum. In de Sobernheimer Runde hott se Frage zu ihrm Lewe beantwort unn vorgelese aus dem Buch, das es üwwer se gibt: Lutz van Dijk: „Zu keinem ein Wort! Überleben im Versteck. Die Geschichte der Cilly Levitus-Peiser.“ Es koscht 6,90 Euro unn LeCoutres honn’s vorrätich.
Beim Lese werre Se merke: Mensche wie die Cilly Peiser brauche mir zum Lebe unn zum Üwwerlebe so dringend wie e Krug klar Wasser, e Laib Brot unn e Rose.
quelle: http://www.allgemeine-zeitung.de/region/bad-kreuznach-bad-sobernheim-kirn/vg-bad-sobernheim/sobernheim/9626289.htm